الشيب الذي بهامتي هموم الوكت .. دجّته
وسوالفك بالكــلب خنجر غدر .. دجّته
ومــن الشماته ملح جابت إله .... ودجّته
بسجين عميه وتكص كلبي وضكت .. كصتك
وتك ايد كص الدهر وسيف الغدر..كص تك
شو بس علي من اجي تلطم لطم .. كصتك
مثل المغيسل صفت كصتك مثل دجّته
********************************
يفلان هم العلي كاع ويطكهه ... كرك
ولاتنتخب كل بشر لو راد دهرك...كرك
شما تتعب ويه الردي رايح يصاحب .. كرك
وثق لو طحت بالعسر بيك النذاله .. شفت
وجروحي صبخه وتنز لالا تضنهه .. شفت
يالمنكسر خاطرك هم مثل هايه .. شفت
ديج ويعوعي الوكت عالبيض خلاّ كرك
*******************************
برمضان هجرك تبت سحّرت كلبي..فصم
وحنضل بعد غيبتك خلصته صم .. فصم
يالفاركتني الضهر بيدك فصمته .. فصم
وماتنحمل فركتك بحبال كلبي .. جرت
خلص دمع ناضري وعيني بشحمهه..جرت
ارد اسأل العارفه هم عله واحد .. جرت
عثوك اكو بنخلته بس ماكو كلهه..فصم
********************************
موبطلت ياكلب كلي شفت منهم
وضنوني طلعت غلط بيك وصدك ضنهم
احفظلي ماي الوجه كف وابتعد عنهم
يالوح وك ياخشب خايب اكل منشار
بالراس ماضل عقل موسهله بيك الصار
كتلك تجيك الشمس بفيهم كلتلي اندار
غشوك طلعوا غلط تالي حركك فيهم
*******************************
كلي الربع بينو كتله الربع ظلو
كلي اشو مااجو كتله اعتقد ظلو
كلي تعرف السبب كتله السبب ظل لو
درب العلينه صعب لو عاذل نمرهم
كلي طبعهم شنو كتله الحلو مرهم
كلي اذا ما اجو كتله لعد نمرهم
كلي اشو غيمت كتله الربع ظلو
****************************
اجلي بحديد الزمن مبرد وانه منجلي
بس جية الموت مامنهه ابد .. منجلي
يكولون ليل الحزن لابد وان منجلي
وتطلع علينه شمس لمن وكتهه يحن
وجف الترك حنته للحنه يرجع يحن
يفلان تدري شوكت كلبك عليه يحن
لمن عله السنبله يعطف كلب منجلي
***************************
فرصه انطيني ومهلني..لعلماك
اخاف تكول ماادري ..لعلملك
اني الساريه الواكف..لعلماك
من اطيح تطيح خركه عله الوطيه
***************************
ارخصك عالجروح وهذا ..خله
تلجمه وخاف كلبي يريد .. خله
الوفيت وياه كبلك راح..خله
اجه المايشتري يعاين عليه
***************************
طبعك موشجي وكتلك ..شجاني
شجنيت وياك شوكلي..شجاني
امس جنت انحضن وانشم.. شجاني
قنفذ والحضن حسره عليه
*************************
الشاعر الكبير سمير صبيح
`·.¸ كل الهلا بيكم نورتونا 
الخميس 30 مارس - 16:55 من طرف 
