سمير صبيح - شيعوضني الدمع

شيعوضني الدمع وانه الخسرته اهواي
وعلى رملة امل كل عمري وشلته
وانه الباكو نهاري ورحت ادوره بليل
والمسودن طبع ميعوف سالفته
على نفس الدرب ذبولي بس الصوف
حتى ارجع واكول اذياب ماكلته
واني الماصبر والعطش ماوازاه
دنت نفسه وذبح بالصحره راحلته
كلب ماجنه كلبي جني متبنيه
جرعته التعب مايوم دللته
طفل من ايده اكوده وهوه يمشي اوياي
وعلى ضحكه بكهف للموت نزلته
انقفل باب الصبر كد ماادك اعليه
مو خالي كرم بس اني مللته
بعد ماهد سهم كون الطريده بعيد
مابيهه فخر لو اكول وصلته
وشفت عصفور ميت كل جرح مابيه
حرت هذا المنيه اشلون واصلته
شلت راسي وشفت بالشجره عش محروك
كلت هذا السبب والحركه كاتلته
ونفس موته متت والجسد لحد الروح
وحسراتي الجفن وبدمعي غسلته
سحب سيفه الزمن هل من منازل صاح
أعزل ماخفت والزمن نازلته
مالحته ابد لكن ترسني اجروح
بس عندي المهم ماعفته قاتلته
دبسك ياضمير الصار بيه اهواي
بسك هالعمر مايوم جاملته
حذر بسوالفي نكلة جدم صياد
واسال خاطرك هم يوم جفلته؟؟؟
كصبه اعله الجرف يدفعها روج الضيم
ويحنيني الهوى بس طبعي عدلته
آنه ابن الجنوب السور والباب
وهوري وطيبتي ونخل العناوين
انه السيف الرفض نومات الكراب
وانه النسمه التهب من الروازين
وانه الفاله الغفت بصدور الاجناب
وانه الضحكه التواكح خزرة البين
اذا كالوا كرم طارينه ينجاب
وطبع ناعور ماتهده الفناجين
نصعد عالجروح طباع لبلاب
ولاثيل ذليل تدوسه رجلين
انه النهرين عندي تلاكوا احباب
حبيبين التقوا والحب بساتين