نائل مظفر - حجيك كلة يوصل

قصيدة الاول اني .. نائل المظفر :

حجيك كلة يوصل واني اعديه
لان قل مستواه عن سمع اذاني

ولان بس الوراية بضهري يحجون
وراي انت الحجي من ضهري إجاني

انه اول والوراي الرابع يصير
لاثالث وراي ولاكو ثاني

واخليك بمكاني وكلشي ميصير
تكول الناس ضل فارغ مكاني

واني صفاحي وجهي ووجهي مكفاي
مثل وجه النخل ماعندي ثاني

وتكص بيه اصدقائي وتطعم إعداي
واناني وانوكل بس مو اناني

المهم ملكة الاضيفة ولايصب جاي
احس الماي شبعني وجساني

يسألوني شذبحلك ماكلت ماي
كلت وجهين مفروشة الصواني

وتعرف ليش انه تحبني الناس ؟؟
لان عالراس خليت اصدقائي
وصديقي المايحطني عكال عالراس
بعد قيطان ماشدة بحذائي