شباب اليوم جبتلكم قصيدة صح طويلة شوية بس بكل بيت اكو نصيحة لتحدي الواقع الحالي اقروهه وشوفوا واتمنى تنال اعجابكم
القصيدة تكول:
مو كلمن فتحلك باب يهواك
ولا كلمن يكرهك بابه ينسد
اكو مسدود بابه وكلبة مفتوح
واكو مفتوح بابه وكلبه اسود
اذا طشيت صحبانك على الماي
اثكلهم وفه الجواك يركد
واخففهم يضل طافح على الراك
يروح وية الجزر ويرجعة المد
اذا محتار سافر تعرف الناس
منو يزت القطار ويوكف ازيد
اكو تشدة بحبل ويكطعة ويروح
واكو بكلمة شرف عالسجه ينشد
واكو بمشية قطارك عينه تحتار
وباللحظة الاخيرة وياك يصعد
واكو يشيل المحطة وية القطارات
ويدكهه على كلبة وصدرة ينسد
فرق بين اليعبدك بالمحطات
وفرق بين البناك بكلبة معبد
لا تآمن بشر من طينه مخلوق
بس اربعطعش طينه محمد
مو كلمن ضحكلك منه ترتاح
تره ناب الضبع كل ضحكة ينحد
ولا تحقد على كلمن يبجيك
اذا دمعك طفح صدكني تبرد
البشر دلة ويفور بداخلة الضيم
اذا يطفح دمع نيرانه تخمد
ولا تحقد على الصعدوا بله جناح
معروف الصكر لو جنحه ينشد
ومو كلمن نزل يتسمى مذلول
ولا كلمن صعد يتسمى امجد
اكو صاعد رغم ماهو عالكاع
واكو نازل يضل لو قمة يصعد
راسك منتصب اعلى من الايدين
بس من السهل تتناوشة اليد
اذا عندك جبل خلهم يصعدون
فرق بين الصعد والراد يصعد
اكو يهده الجبل لو هد الجفوف
واكو يهد الجبل لو جفه ينهد
وعلى المبرد كفر تنغر السيوف
لان سيف على سيف بكلبة ينحد
واذا عنهم رحل كلهم يخسرون
شنو نفع السيوف بلية مبرد
وما يرحل جذب مو خاف يعمون
ويضل السيف تالي بكصبه ينصد
اذا تعزف لحن ويذمك انسان
لاتكطع كمانك صعبه ينشد
مرات اللحن مايطرب الناس
ومرات البشر اذاناته تنسد
ومرات اللحن يطربله طرشان
بس طبع اليسمعك زور يشهد
على البلبل يكلك منكر الصوت
واذا ينهك حمارة يكول غرد
اذا حجيك حكم وتخاطب الناس
كل راس عله كدة وياك ينشد
لان روس البشر عكس الفراغات
كل ماتنترس تستوعب ازيد
واذا تحجي ويرد صوتك كما كان
يعني اليستمع فارغ مجرد
صوتك مايردة الراسة متروس
لان بس بالفراغ الصوت يرتد
واذا ضيمك كبر لا تحجب العين
وتشوف الدنيا كلها بلون اسود
منو بهذا الوكت ماغيره الضيم
حته بيوم الاحد ماكو احد
لكن لاتضل تحسب توابيت
انه كبلك علي صب اسود العد
رفعت راسي وكمت احسب بالاعراس
على عناد السواد الابيض امتد
ولو غثني الطفل من شفته بالعيد
يشد بجروح ثوبه ودمعه عالخد
بس اني فرحت جي جته الاطفال
ومسح كل الدموع وراح عييد
علمنا الطفل يصبر على الضيم
وطلع منا الطفل ايمانه ازيد
اريد اطرح قضية وانتوا اسلام
واريد اسأل جمعكم واطلب الرد
بنيتوا شكد معابد كلهه عالكاع
منو البيكم بناله بكلبه معبد
ماكولن كفر لو قلة ايمان
لكن مهزلة وما الهه احد
لتلاثة الملاهي مفتحة بالليل
وبالعشرة الجوامع كلهه تنسد
منقول لعملاق الشعر الشعبي نائل مظفر