نائل مظفر - نتيجة العراق الدراسية !

ادرس ياوطن اني امتحنتك ليش ؟؟
المفروض منك تاخذ انت اعفاء

راسب مدري ناجح مدري طحت اكمال
مجموعك شعب شيجمعه صار اجزاء

اقرالك درجتك كلهه بالتفصيل ؟؟
وانطيك النتيجة وتفرح وتستاء ؟؟

خذت باللغة مية عالعروبة البيك
وصفر كل العرب من الالف للياء

لأن كلك قواعد ياوطن مملوء
صرت اشطر بلد عمي انت بالاملاء

ولهذا السبب كسلان بالاعراب
ولهذا السبب ليهسة ماكو انشاء !!

امريكا واختهه يرفعن الخيرات
وينصبن قواعد ترسن البيداء

وفعل ناقص تعربه وشعبك المسكين
مفعول به....! بل حتى بالآباء

والفاعل تعرفة وتبني للمجهول
تحالف مستتر تقديرهم اعداء

وبغداد وخبرها اعربهن بيا حال ؟؟
مكسورات خاطر هية والحدباء

واكسل بلد انت بالرياضيات
يحكمونك جبر وتكول استفتاء

واحنه بدائرة وطول المحيط ذياب
والمركز عميل ونص قطرنه اعداء

مثلث سني جنه وشيعي متحدين
كسرت ضلوعنا وما مكتفي بما جاء

ضربتنا وقسمتنا ونقصتنا هواي
وبعد ماننجمع حاصل جمعنه اشلاء

وباوعت على شعبك شفته كله اموات
وانطيتك صفر ياوطن بالاحياء !!

وعفيتك بالزراعة وهسه اكلك ليش
لان صارت فحم كل ارضك الخضراء

ولان اكثر بلد بي تنزرع عبوات
اسألة الزراعة تحلهه بالكيمياء !!

ودرجتك مو صفر مية صفر بالدين
بيك حسين ميت والطغاة احياء

وبيك العسكري المحد يزورة بطيف
مسجون بحضرته ام لاسقف جرداء

وخيرك ينسرق سراقة معروفين
حته الاعمى سألة يكلي هؤلاء

ولافتوة سمعت من كل رجال الدين
وسماك من العمايم تنفرش سوداء

حسرتنه على حقنه وحقك المسلوب
بكبر حسرة فدك عد فاطمة الزهراء (ع)