تعتني الروح مرة ومرة تلها.
ليالي شكد صعبة مرت الها.
همر قلبي وتاهت من رتلها.
تعال صير عبوة وطك عليه.
_______________________
جريح الوطـــــن ينزف بلاداي
وجثير اجيوش هالــطبت بلاداي
اقاتل لو صرت عـــاجز بلاداي
مثل عبـاس بارض الغاضريه
_______________________
سلطانك وصل للظيم خايب وصه بيه
انه بطيبي الصبي شاهــد والصبيه
عابر سبيل احسبني ربــك وصه بيه
وفك حبال ظيمك من اديه.....
_____________________________
حرت شكتب على البداع شطري
استحه من اشطوركم ماطال شطري
اعرفكم عليه اصل شطري
يعني احد افراد الناصريه
___________________________
نحيل الجسم من بعدك تراني
واريدك دوم بعيونك تراني
افكر بيك كل ساعه تره اني
احبك حيل يل كلك اليه
___________________________
كلبي ما لعب غيره لعابه
واحسن دوه لامراضي لعابه
سبحانه الذي صاغه لعابه
ونفخ بي روح حتى يعم عليه
_______________________
همومك مو عفتهن كتلي شو جن
وهم ماتبت عقلك تسل شو جن
شزرع كلبي بمحبتك كلي شوجن؟
جنالي هموم وخبال واذيه
كلبي من الصغر حبه بدالك
ومااظنة ايعشك واحد بدالك
سوي شما يعذبني وبدالك
احبنك قفلت وهاي هيه
_______________________
يصاحب لو تشوف اشلون كتماي
على عيوني ويسح الدمع كتماي
اشما اكل للروح سر الهوه كتماي
تحن وتهيج الساكن عليه
مدري لاتناشدني على احشاي
بجيت وصب دمع عيني على حشاي
تبعت الضعن وكفوفي على حشاي
إشما مال الضعن روحي إتميل بيه
___________________________-
صرت كهوة الحبيبي بوسط فنجان
وفن انس الي يوصله فن جان
اذا العاقل نضرلك نضره فنجن
انا المجنون وتكلي انضر اليه
___________________________
وحك اهل الوفه والملح والزاد
الكرم افضل معاني الشيم والزاد
حلالي مايهمني النقص والزاد
تهمني الناس شتسولف عليه
-----------------------
افرح لو شفت وجهك وسر بيه
وحبك بالكلب ثابت وسر بيه
شماطال الدرب امشي وسر بيه
واجيب الروح لعيونك هديه