نائل مظفر -ظلمة الليل

شباب اليوم جبتلكم قصيدة حيل حلوة لنائل مظفر تصور حال االدنيا الصعب وشلون مكلوبه بكل امورهه والقصيدة بيهه صور شعرية عن الواقع الحالي اتمنى تنال رضاكم
القصيدة تكول:

ياعصافير الصبح لتزقزقين
لا يفز الليل واحنه بلا نجم
اشتبكت الاصوات من كثر الضجيج
وبالحجي المبيوك تتباهه الزلم
الضفادع نافست كل عندليب
لأن مو كلمن يسمعك يفتهم
والبلابل قلدت صوت النهيق
حته تفلت من قفصهه وتنهزم
ودفنت الراس النعامة بمستحى
لأن طاروا بالسمة الاصغر حجم
وعدنه وادم لو تحس مثل النعام
تندفن من روسهه لجعب الجدم
وجي صحت عالبدوي لا تجوي البعير
كلي اسكت يالبعير شتفتهم!!
اختم الحيوان اول مايصير
حته بس يفلت تلزمة من الختم
يا امان ويا ثقه ويا صح تريد
ويا خشب للنار ماضل يلتهم!!!!!!
انكلبت الدنيا وعكس ضلت تدور
وخربت وضلت بعد ما تنفهم
الارانب للأسد تنصب كمين
والفراشة توحشت كامت تسم
والجوارح زحفت وعجزت تطير
والزواحف بالكواكب تصطدم!!
والشمس كصت كصايبهه الحرير
حته لا جاهل يجرهه وتنلزم
وماكو بالدنيا اشد بضهر اخوي
كمنه حته من الورق نصنع حزم
واليطكك بالدهن باجر يجيك
ينحت برجليك من تصبح دسم
كلشي صار بهالوكت ضد الفقير
حته نوع الموت واسلوب الشتم
الاعمى يفرح بالحلم جي بي يشوف
والفكر من يعمى ما يحلى الحلم
وانهجم بيتك تكلي وبيت ابوك
احنه عدنه بيوت خاطر تنهجم؟؟!!!!!
شكد ركضنه وما لحكنه السلحفاة
هي تلبس بيت واحنه بلا هدم
والافاعي بليه سم بس ماتخاف
لو نسويهه حبل هم تبتسم
تدري مانحتاج لحبال السطوح
شما غسلنه الثوب ينشر عالجسم
التذاكر بيدنه وفات القطار
ومن شفت بيه لحلم ضل ينعدم
توسلت بالدنية بس احلم اريد
كالت احلم وارتكب اخر اثم
وحلمت جسرين بس متدحبات
وضالم االيعبر عليهن يبتسم
كالو الجسرين ضهر امك وابوك
اتحدبن .. والضيم يهدمهن هدم

منقول // الشاعر نائل المظفر