لا يا صديقي لا يا حبيبتي...فات الاوان,لاتحذر, شيفيد بعد التحذير..اني عثرت باول حجر والعثرة عثرة بنص بير...لاتحذر فات الاوان...منهم لله الخانوني منهم لله الباعوني..خلو دمعي ينزل دم..ولا كاني بني ادم..اعز اثنين يا جرحي شايلهم وسط روحي..وجهين والعملة وحدة والثوب مكدر عليهم..والشبه نفس الشبه والغدر مزروع بيهم..لا ياكلبي لاتستغرب...كلشي تشوف العيون وكلشي بهالزمن جايز وكل شي ممكن يكون..عدوك يرحم بحالك واعز احبابك يخون...
تصوروا حبي غباء..وطيبتي العميا طريق..فرصة الهم للخيانة مثلوا دور الصديق..اللي جانت اغلى ناسي وي صديقي ترافكت..عيني عينك بالخيانة وبالخجل مافكرت..يا ذنب سويته اني وبالعكس دنياي دارت؟ لان كلبي نقي وطيب..هيجي وياي صارت؟!
شراح اسوي بالصور ووين اودي الذكريات؟ وين الكى درب خالي ماالي بيه ذكريات...
هيجي يا دنيا البشر..بارع بدور الخداع..غامض وما ينحزر وبوجهة اكثر من قناع...لمن اشكي يا زمن؟ ومنو يسمع شكوتي؟ اسكت احسن يا زمن وبيدي اعالج حالتي...موتي ارحم من غدر اللي سميته صديق..اللي جازاني بخيانة وترك باعماقي الحريق..اني متعلم على الهم..وموجديد الهم علية..بعد الشافته عيوني..من صديقي ومنها هية..خلي كلشي يصير بية...
تصوروني الناس اغني واني من الداخل مجروح..روحي مثل الطير ترفرف وشيركص الطير المذبوح..غير الالم والحزن والعذاب والجروح...تظلم لو ترحم يا زمن ماعاد ياثر بية..اذا اغلى الناس خانو شتعوض انت لية؟ صدكني ظلمك يا زمن اهون الي من جروحي..على الاقل ظلمك ينسي ومايظل يعذب روحي..ضيعتني يا صديقي وظلمتني وجرحتني...وظلمت روحك وروحي وضيعت مني الامان...اذا انت بية تغدر..بعد شيسوي الغريب..صديقي وجرحي منك واني لجروحك طبيب؟!!!
روح..روح..روح..الله الليسامح اني ماعندي سماح روح..الملح والزاد خنته والوفا وياك راح...اعترف اني خسرتكم وخسرت كلشي بثواني لكن اللي يعز علية راح اظل وحدي اعاني...
وانتي؟ انتي؟ انتي ياللي جنتي بعيوني ملاك..كلتي انا عمري وعيوني فداك..صورتي الدنيا من غيري ابد متعيشين بيهة وكلتي عنها ظلمة لكن,نور وجهك مضويها..وكلتي بليالي الشتا,عيوني ماتاخذ نوم..افكر بيك بردان لو دافي وشابع نوم..جنتي بالنسبة الي...مثل للحب والجمال كلمة ماكاتبهه شاعر ولوحة من نسج الخيال..عمري ما شكيت مرة..ورا هالطيبة خداع!!
وذيج العيون البريئة تغدر وتمكر بساع!!
هاجت الريح بغضبها وكسرت بلحظة الشراع كلشي ضاع!!!!!
خوفي من خوفي ليكبر..خوفي مافارك الدمعة...وابقى وحدي بالليالي ومااثق بضوة شمعة..لمن اشكي؟ المن احجي؟ المن وحجيي بس اني اسمعه؟
-هي الدنيا شبيها؟ حتى ترخص دمعك؟ لمن تشكي وتبكي؟ ومنو اللي يسمعك؟ انسى جرحك انساه..لاتعاود الذكرى..بالحسرة والاه ليش تخلص عمرك؟
جنت عايش عالأمل,وجانت احلامي جميلة,جنت اتفائل بكل شي والبنيته انتهى بليلة..ضاكت الدنيا بعيوني..وحسيت بنفسي غريب!! وكلت يا روحي كافي..مابقى للطيب نصيب!!
-لا,الدنيا ماتخلى ولاتتخلى عن مجروح,الف ايد وايد تنمد وتداوي الالم ويروح!!
بس اني عثرت باول حجر والعثرة عثرة بنص بير ضيعت كلشي بحياتي وسلمت لاسؤا مصير..
-لاتحزن لاتتألم لاتندم على الليفوت حرام تتعب عيونك والدمعة عليك تموت...
صامد بوجه الرياح..شامخ باصعب جرح..اصعب جراح..
اصرخ..اصرخ..يا ضمير..اصرخ يا ضمير..اصرخ بوجه الليظلم..اصرخ بوجه الليخون..اصرخ وصحي المنافق..اصرخ وصحي المخادع يا ضمير...يا ضمير...